راولپنڈی: پوٹھوہار خطے کی ثقافت اور خوبصورتی کے فروغ کے لیے شروع کی گئی پاکستان ریلوے کی سفاری ٹورسٹ ٹرین گولڑہ اسٹیشن سے اٹک روانہ ہوگئی۔ تفصیلات کے مطابق چیئرمین سینیٹ صادق سنجرانی نے وزیر ریلوے اعظم خان سواتی کے ہمراہ گولڑہ ریلوے سٹیشن پر سیاحتی ٹرین کا افتتاح کیا۔
یہ سیاحتی ٹرین ہر جمعہ، ہفتہ اور اتوار کو گولڑہ سے حسن ابدال، اٹک خورد اور اٹک شہر جب کہ اطراف کے علاقوں میں جانے والے سیاحوں کو سیر کروائے گی۔ ٹرین کا یہ سفر گولڑہ، ٹیکسلا، حسن ابدال اور اٹک شہر کے ریلوے سٹیشنوں سے گزرتے ہوئے تاریخی اٹک خورد اسٹیشن پر اختتام پذیر ہوگا۔ سیاح پوٹوہار کی خوبصورتی کا تجربہ کریں گے جس میں مارگلہ کی پہاڑیوں، سنگجانی سرنگ اور چبلال برج، ہارو پل، غازی بروتھا اور اٹک خورد پل جیسے بہت سے پل شامل ہیں۔ سفاری ٹرین صوبہ پنجاب اور خیبر پختونخوا کے درمیان دریائے سندھ پر واقع قدیم آئرن گرڈر پل سے بھی گزرے گی۔ گولڑہ ریلوت سٹیشن کی طرح پاکستان ریلوے نے اس سٹیشن پر بھی ایک میوزیم تعمیر کیا ہے۔
بلاشبہ سفاری ٹرین کا آغاز ملکی ثقافت، قدرتی خوبصورتی، تہذیب اور ورثے کو فروغ دینے کے لیے ضروری تھا. ایسی سیاحتی و تفریحی سرگرمیاں سیاحت کے فروغ کا اہم ذریعہ بنیں گی. ضرورت اس امی کی ہے کہ اس طرح کی ٹرینوں کو ملک کے دیگر علاقوں میں بھی شروع کیا جائے تاکہ پاکستان ریلوے ملک کی قدرتی خوبصورتی اور ثقافت کو فروغ دینے میں نمایاں کردار ادا کرسکے۔
“گولڑہ اور اٹک کے درمیان سفر کے لیے خصوصی سفاری ٹورسٹ ٹرین کا آغاز” ایک تبصرہ
تبصرے بند ہیں