بہت پر لطف گو اُردو زباں ہے
حافظ محمد ولایت ﷲ حافظ (ناگپوری)
بہت پُر لطف گو اُردو زباں ہے
مذکر اور مونّث کی ہے دقّت
حجاب و پردہ گھونگھٹ اور برقع
مذکر ہے یہ کل سامانِ عورت
مونث ہے جنابِ شیخ کی ریش
ہو کچھ بھی اس کی مقدار و طوالت
مذکر ہو گیا گیسوئے جاناں
ہوئی اس کی طوالت کی یہ عزّت
دُوپٹّہ عورتوں کا ہے مذکر
مونث کیوں ہے دستارِ فضیلت
فراق و وصل ہیں دونوں مذکر
مونث ہے مگر واعظ کی صحبت
ہوئیں جب مونچھ اور داڑھی مونث
تو پھر کرنا پڑا دونوں کو رخصت
